TACLOBAN CITY – Papasakahan hin showcause order han Tacloban City Agriculture Office kaupod an mga concerned agencies an mga singabot nga negosyante ngan manirinda nga ma-umento han ira mga root crops.
Sumala kan Tacloban City Agriculture Office Head Romelo Anade, nga mayda nira igpapandeploy nga mga tawo ngan civilian volunteers agud magbantay ha kiwa han presyo han mga root crops ngan ha mga singabot nga indibidwal nga mag-o-overprice han mga ini.
Dugang hini nga an pagbabantay nira in agud malikayan an pagsingabot han mga negosyante labi na an mga nalaray la ngan waray mga permit ngan lisensya nga mag-umento han ira baligya nga kadaras-an ginpapahitaas kada-Semana Santa.
Ini gihapon in agud magin-patas ha mga konsumidor in labi na nga nakakaabat an tanan hin krisis.
Sumala pa hini nga waray rason iton pag-umento ha presyo han mga root crops mahitungod nga supresyente iton suplay hini ha rehiyon.
Samtang padayon naman hira nga magmomonitor kutob ha kulop han Sabado de Gloria, kun diin ini nga mga panahon, sumala kan Anade, in an adlaw nga mahalin iton mga root crops.
