TACLOBAN CITY – Dismayado an pira nga mga residente han pabahay ha Greendale 2 ngan 3 Resettlement Site ha Norte nga parte han Tacloban, mahitungod nga haros lima na katuig in waray la gihapon hira kuryente.
Sumala han usa nga residente han mao nga pabahay, ira iginkakasubo an nanabo nga pagpapaturuturiyan han National Housing Authority (NHA) ngan developer han mao nga pabahay kun hin-o gud an may sayop ha ira.
Pirmi daw la hira ginsisinaadsaaran ngan ginpapasa pasa han NHA ngan han developer han pabahay.
Sumala ha NHA kinahanglan anay nga magcomply han developer ugsa nira nga baydan pero ginduon naman han developer nga kinahanglan anay nga bayaran anay hira san-o igkab-it an kuryente.
Ini naman in nagdudurot hin kalipong para ha mga residente ngan humagos na ini hin halos lima katuig nga sugad an ira sitwasyon tikang han pag-igo han Supertyphoon Yolanda.
Samtang, nagpatapod naman an city government han Tacloban nga nagbubuhat na hira hin pitad agud nga masolusyunan an mao nga problema ha mao nga resettlement site.
