BORONGAN CITY – Makakakarawat hin kompensasyon o national indemnification an mga parag-baboy nga naapektaran han African Swine Fever (ASF).
Sumala kan Provincial Veterinary Office Assistant Department Head ngan ASF Provincial Focal Person, Dra. Melanie Osita, ngatanan nga mga parag-baboy nga naapektaran han ASF ha Borongan nga ada ha ground zero ngan sakop han .5 km radius tikang ha breeding center o demo farm han kababoyan ha ESSU-Borongan in makakakarawat hin bayad tikang ha gobyerno.
An kantidad han indemnity nga makukuha in madepende ha ka-agal o kabug-at han usa nga baboy.
Kun an baboy in pasi pa o dire malahos ha 25 kilos an timbang, ada ha P4,000 an makakarawat, ha kada usa nga baboy.
Kun medyo dako o gower na ngan ada ha sulod han 70 kilos an timbang, P8,000 an makukuha ha kada usa nga baboy,
Kun anay na o breeder an baboy, makarawat liwat hin P16,000 an parag-baboy ha kada usa nga baboy.
An makakakarawat la naman hine in an mga parag-baboy nga dire insured ha PCIC.
Sumala pa naman kan Dra. Osita, an nasabi nga indemnification in dako nga bulig agud makontrol an pagsarang han nasabi nga virus, mahitungod nga dire la mapupugngan an mga pag-iihaw o pagtatago han mga baboy kundi an mga parag-baboy na mismo an magpi-presentar an ira mga baboy nga nahibibilin pa ha ground zero.
Samtang, nananawagan gihapon hine ha mga parag-baboy nga dire mag-ihaw hin baboy kun nakikitaan ine hin mga sintomas han nasabi nga sakit, sugad han dire pagkaon han baboy ngan pagkakamay-ada hin mga pantal-pantal, lugod in dire mahadlok ngan igpahibaro la ha City Veterinary Office agud malikayan an pagsarang han ASF. (Bombo Shiela Encio)
