TACLOBAN CITY – Nakatalaan nga pagbuhaton an public hearing yana nga adlaw han mga magbaralaod ha Naval, Biliran may kalabutan ha guinduduso nga mga ordinansa ha mao nga lugar.
Subay ha guinpagawas nga impormasyon nga unod han guinduduso nga mga ordinansa an pagdiri ha mga motorista nga gumamit hin bisan ano nga materyal nga nakakatahob ha mga pangilal-an ha mga ini.
Sugad man, hingyap liwat nga igpatuman an pagkamay-ada hin speed limit nga maabot hin 20 kilometros kada oras.
Guinduduso liwat nga magkamay-ada hin kakaatubangan nga pendalidad an hin-o man nga makakatalapas ha mao nga mga ordinansa.
Mababaruan nga panuyo han mao nga ordinansa nga malikayan an aksidente ha kakalsadahan ngan mga panmatay sugad nala han guinkakahadlukan nga riding in tandem.
