NATIONAL – Iginduon han Volunteers Against Crime and Corruption (VACC) nga kinahanglan gihapon ig upod ha panawagan ni Presidente Ferdinand Marcos Jr. nga magbul-iw ha pwesto an mga nagmamangulo ha mga “under-performing” nga ahensiya han gobyerno ngan korporasyon.
Ha usa nga pahayag, ginmalatumat han anti-crime advocacy group an mga lider han government-owned and controlled corporations (GOCCs) sugad han Philippine Charity Sweepstakes Office (PCSO) ngan Philippine Amusement and Gaming Corporation (PAGCOR), sugadman an Bureau of Customs, Bureau of Immigration, ngan Philippine National Police (PNP) nga kinahanglan lumusad ha pwesto ngan pabay-an an Presidente nga aydon an gobyerno agud malingkuran an mandato hine ha mga Pilipino.
Iginpunto ni VACC president Arsenio Evangelista nga dire la dapat an Cabinet Secretaries an hangyuon nga magbul-iw ha pwesto, kinahanglan gihapon ig upod an mga nagmamangulo han ahensya sugad han PCSO ngan PAGCOR nga gingagastos daw an pondo han nasud ha mga buruhaton nga waray gamit para ha mga Pilipino.
Dugang pa ni Evangelista, pauru-utro nga nadabi an PCSO ha magkaduru-dilain nga mga isyu kaupod an daw korapsyon ha sulod han ahensya nga gin imbestigaran ha Senado.
