TACLOBAN CITY – Nakarawat han Tacloban City Hospital an magkadurudilain nga medical equipment kumo donasyon tikang ha usa nga amity club han siyudad.
Sumala kan Tacloban City Hospital, Nurse Supervisor Rhodora Pongos, nga an mao nga donasyon in tikang ha Filipino-Chinese Amity Club, Tacloban City Chapter kun diin, nakarawat han ospital an mga nasabi nga kagamitan dida han nakalabay nga Setyembre 7, 2024.
Nakarawat han TCH an aada ha 15 ka-units nga hospital bed, 10 ka-units hiton wheelchair, 30 units hiton Folding Bed, 2 units nga Multifunction Baby cribs ngan Ambulance Collapsible Stretcher, 2 units nga Pulse Oximeter ngan 2 ka-units hiton Suction Machine.
Dugang naman ni Pongos nga an mao nga mga kagamitan in dako nga bulig ha ospital in labi na nga damo iton mga pasyente nga napatambal ha mao nga health facility ngan ini in makakabulig hin dako agud maatimanan an mga ini.
Samtang, nagpapasalamat naman an bug-os nga buhatan hiton Tacloban City Hospital ha ira nakarawat nga donasyon tikang ha Filipino-Chinese Amity Club, Tacloban Chapter nga ginpangunahan ni Samuel Ngo ngan sugad man kan Mayor Alfred Romualdez.
