INTERNATIONAL – Yinukot-yukot nga mga kababayin-an an nag dumara hin gios-protesta ha Jakarta, Indonesia kumo pagpakita hin pagkontra ha madararhog han kapulisan ngan an grabe nga benepisyo han mga magbaralaud.
Dara nira an siphid nga nagsisimbolo hin panawagan nga tanggalon an hugaw ha estado ngan pagkontra ha puwersa han seguridad.
Dara nira an mga placard nga may mensahi sugad han “Your sweet promises cause diabetes” ngan “Reform the police”
Kun manunumduman nga natabu an kasamok ngan protesta ha nasud mahuman nga maligsan han pulis vehicle an usa nga food delivery moto-driver dida han naglabay nga semana, nagresulta ine hin dako nga gios-protesta ha bug-os nasud.
Samtang, umatinder naman hi Indonesian President Prabowo Subianto ha military parade ha China.
Ha pagkayana naghihimo pa hin imbestigasyon an National Commission on Human Rights kabahin ha isyu.
