EASTERN VISAYAS – Pira nga mga insidente hin pagbabaha an nahipatik ha magkaduru-dilain nga parte han rehiyon mahitungod han makusog nga pag-uuran.
Ine in sumala kan Office of Civil Defense Eastern Visayas Regional Director, Lord Byron Torrecarion.
Ha Naval, Biliran, walo nga insidente hin pagbaha an nahipatik, unom ha San Isidro, Leyte, usa ha Tarangnan, Samar, usa ha Villaba, Leyte, ngan usa ha Catbalogan City.
Ada naman ha 26 ka-pamilya o 77 nga indibidwal an kabug-usan nga ihap han mga nagbakwit ha Naval, Biliran.
Sumala pa kan Torrecarion, waray nahipatik nga mga nagbakwit ha iba nga ginbaha nga lugar mahitungod nga humubas man dayun an tubig-baha.
Passable gihapon an ngatanan nga kakarsadahan nga ginbaha labot la han Brgy. Larrazabal, Naval, Biliran, kun diin one lane la an naaagian.
