TACLOBAN CITY – Naglalaum iton mga residente han mga tay-aw nga barangay ha Maslog, Eastern Samar nga mas magigin maupay an ira panginabuhi yana nga titikangan na pag-ayad an karsada nga magdudugtong han ira bungto ngadto ha Jipapad.
Una hini, dida han nakalabay nga Biyernes, Mayo 26, gindumara an ground breaking ceremony han han Maslog- Jipapad Road ha bungto han Maslog.
Ini nga seremonya in ginpangunahan nira 4P’s Partylist ngan Minority Leader, Congressman Marcelino Libanan, Maslog Mayor Heraclio Santiago, DPWH -Eastern Samar District Engineer Alvin Ignacio ngan iba pa nga mga opisyales han gobyerno.
Purluminos PHP 100million an pondo hini nga proyekto ngan ginlalauman nga matitima ha sakob hin walo kabulan.
Sumala kan Federico Bergonio, kapitan han Brgy San Roque ha Maslog, Eastern Samar tungod nga diri sementado an ira karsada, makuri an pagdara nira han ira mga produkto tikadto ha bungto.
Hirayo liwat an ginbabaktas han mga estudyante para la makaeskwela.
“Makuri an transportasyon tungod nga diri sementado an dalan, mahal it pasahe. Kada sako han mga lubi ngan humay tag 100 pesos. Madalunot liwat kon nauran. Iton mga estudyante tulo ngada ha lima kakilometros an pagbaktas”, pahayag ni Bergonio ha pakikipaghimangraw han media.
“Yana nga makakarsadahan na kami, duro gud an amon kalipay ngan pasalamat”, kadugangan nga pahayag hini.
Sumala liwat kan Alberto Nuguit, kapitan han Brgy. Tugas nga bisan an ira kuliglig in madagmit maruba tungod ha makuri hiton dalan.
“Ha amon karsada, nakakaagi gad it kuliglig pero pira kaadlaw naruruba tungod kay mabatsi hin duro. Duro iton dagko nga bato tungod diri man sementado. Salit nagpapasalamat kami nga matutuman na an amon hingyap nga magkaada hin sementado nga karsada”, pahayag ni Nuguit.
Dugang pa nga hini makakabulig liwat an pagtitindugon nga karsada agud mawara na an impluwensiya han mga New People’s Army ha ira lugar.
Samtang, ginpahayag liwat ni Mayor Heraclio Santiago nga kon matima na ini nga proyekto mas magigin madagmit na an biyahe tikadto ha ira bungto.
Sugad man, padayon liwat nga gin-aayad an Dolores- Maslog Road nga ginbutangan hin pondo nga PHP350million.
Ginpatapod liwat ni 4P’s Partylist Representative ngan Minority Leader, Congressman Marcelino Libanan nga sunod nga tuig popondohan ini nga road project hin PHP450million.
Nagpahimtangon liwat an kongresista ha Department of Public Work and Highway ( DPWH) nga implementing agency hini nga mga road projects nga himuon nga 12 inches an kadakmol han mga karsada kumo preparasyon para ha ira plano nga himuon ini nga usa ha mga national highway.
“Hinaot unta ha budget hearing makadugang kita hin pondo nga 450million. Tatapuson ini naton nga mga karsada ngan magmamartsa kita ha progreso. Tatapuson ini naton nga Samar Island Circumferential Road”, mensahe ni Libanan ha mga molopyo.
