TACLOBAN CITY – Nanawagan an mga anay membro han walhun nga grupo nga Communist Party of the Philippines – New People’s Army – National Democratic Front of the Philippines (CPP-NPA-NDFP) tikang ha magkaduru-dilain nga parte han nasud ha Commission on Election (COMELEC) kasumpay han COMELEC Resolution No. 11116 o an “Anti-Discrimination and Fair Campaigning Guidelines for Purposes of the May 12, 2025 National and Local Elections.”
An nasabi nga COMELEC Resolution in ginpirmahan dida la han Pebrero 19, 2025.
Sumala kan Eastern Visayas Regional Party Committee (EVRPC) Former Education Deputy Secretary ngan Eastern Visayas Peace Builders & Development Federation Inc. President, Alma Gabin, waray maraot han sulod han resolusyon mahitungod nga an panuyuan hine in kontrahon an diskriminasyon ha tiarabot nga piniliay ha Mayo 12, han presente nga tuig, labot la han sulod han Section 2 (j) may paghisumpay ha labeling.
Dugang pa hine, duro hin kadako an probisyon han Section 2 (j) han COMELEC Resolution No. 11116 kun diin ginhihimo himo nga liable an hin-o man nga magli-label han mga kandidato kumo terorista, kriminal, aktibista o anu pa.
Magbabaton naman ha election offense pursuant to Section 13 han RA 9006 ngan Section 21 (e) han OEC, ngan ha iba pa nga kaangayan nga balaod an hin-o man nga magtatalapas han nasabi nga resolusyon.
Sumala pa hine, pagtalapas ine ha mga na-eksister nga balaod ha Pilipinas sugad han freedom of speech ngan freedom of expression.
Dire daw hira nagyayakan kun dire tinuod an usa nga butang o waray nira mismo ma-eksperyensyahi, pero mayda daw manggud mga grupo nga nagka-counter o dire natuod han ira mgapahayag ngan ginpapagawas nga ‘labeling’ la ine bisan paman kun mayda hira ginpapakita nga mga ebidensya.
Sanglit, naghahangyo an mga ine ha komisyon nga tanggalon o amyendahan an nasabi nga resolusyon agud mahilinya ine ha 1987 Constitution ngan international convenants.
Samtang, naglalaum naman an mga ine nga mababaton han COMELEC an position paper nga ira igin salawad ha sulod hin napulo kaadlaw.
