![](https://img.bomboradyo.com/tacloban/2019/06/received_2490297471017115-1.jpeg)
PHOTO COURTESY: BABYLEN TANGLAO
TACLOBAN CITY – Lima nga estudyante ha senior high school an nahalop mahuman nga makahanggab hin nangangalimyon nga baho tikang han nadudunot nga liso hin mais nga ginlabog hirani han Eastern Samar National Comprehensive High School.
Sumala kan Nickle Rey Cañete , magturutdo ha mao nga eskwelahan nga usa ha mga biktima an dayon nga gindalagan ha ospital samtang upat an gindara ha ira school clinic para matagan hin first aid.
Dugang pa hini, nga dida pa han nakalabay nga Lunes nagtikang nga makabaho an mga estudyante hin malain nga hangin nga nagtitikang daw ha Provincial Agricultural
Service Research and Extension Center, purluminos lima kametros an kahirayo tikang ha senior high school building.
Una hini, naghapil hin sobra 30 kasako nga nadudunot nga mga liso hin mais an Office of the Provincial Agriculturist (OPAS) ha ira demo farm hirani han eskwelahan para himuon unta nga organic fertilizer.
Amo ini an mga liso nga waray na kahatag han mga parag uma tungod nga mayda na mga bukbok ngan diri na pwede igtanom pa.
Sumala pa kan Cañete, bisan pa kon nagsusul-ot na hin face mask an mga bata kon nagkaklase ngan ginsasarado nira an mga bintana han mga klasrum, nasulod la gihapon an malain nga baho ha sakob rason nga diri nakakapokus an mga estudyante ha ira pag-aram.
“Danay diri gud nakafocus an mga estudyante, naka-interrupt ha klase. An amon nala ginbubuhat tikang han Monday kutob kakulop ginsasarado nala namon an mga bintana pero an hangin manggud nasulod”, an pahayag ni Cañete ha interview han Bombo Radyo Tacloban.
Tungod hini, nagdesisyon an pamunuan han eskwelahan nga suspendihon la anay an klase yana nga adlaw ha senior high school nga hirani han research facility.
Ha interview han Este News kan Deogracias Paano, Head han Office of the Provincial Agriculturist, aada na daw ha state of decomposition an ira ginlabog nga mga liso hin mais sanglit malain na an baho hini.
Nangaro naman ini hin despensa ha panhitabo ngan gintatalinguha na han ira opisina nga matanggal an alimyon han ira ginhapil.