NATIONAL – Nahipatik han Department of Health (DOH) nga mayorya han mga namatay ha leptospirosis in tikang ha Metro Manila kahuman han paglobo han kaso resulta han haluag nga pagbaha dara han naglabay nga bagyong Carina ngan Habagat dida han nakalabay nga bulan.
Sumala kan DOH Assistant Secretary Albert Domingo, ada ha 43 katawo na an namatay mahitungod ha nasabi nga sakit kaupod an 41 nga adults ngan duha nga kabataan. Waray naman igdetalye han opisyal an insakto nga ihap han namatay han rehiyon.
Basar naman ha datos tikang han Agosto 8 kutob Agosto 13, ada ha 523 an bag-o nga kaso han nasabi nga sakit an nahipatik ha mga hospital han DOH ha bug-os nga nasud kun diin 423 han mga ine in adults, samtang 100 naman an kabataan.
An nasabi nga period in sulod han duha kasemana nga incubation period o panahon kun san-o gumawas an mga sintomas han sakit kahuman han haluag nga pagbaha nga gin-abat dida han Hulyo 24.
