TACLOBAN CITY – Patay an usa nga menor de edad mahuman nga madat-ugan hin bato ha usa nga salog ha Brgy. Taghuyan, Burauen, Leyte.
Ginkilala an biktima nga usa nga lalaki, 12-anyos, ngan residente han nasabi nga lugar.
Sumala kan Burauen Municipal Police Station Chief of Police, PMaj. John Rey Layog, mangangawil unta an biktima han magtimpag an gintatamakan hine nga bato ngan nadat-ugan ine.
Basar ha inisyal nga imbestigasyon, upod han biktima an iya bugto nga nanlalaba samtang an biktima in nangangawil.
Ha pangawil hine in naglakbay-lakbay ine ha mga bato han tigda naman nga magtimpag an mga bato ngan madat-ugan an biktima, kun diin dayon naman nga nangaro hin bulig an bugto hine.
Umabot naman hin 30 minutos ugsa matanggal an mga bato nga nakadat-og han biktima kun diin waray na kinabuhi an biktima han katanggal han mga bato.
