TACLOBAN CITY – Naghatag hin pagklaro hi Tacloban City Mayor Alfred Romualdez kasumpay han isyu han Tacloban-Campetic nga ruta kun diin temporaryo hine nga ginsuspendi an ginpalusad nga ordinansa kabahin han bag-o nga route plan para han nasabi nga mga multicabs.
Dire na daw niya karuyag nga pahilabaon pa an nasabi nga isyu sanglit nag-isyu hiya hin temporaryo nga suspensyon ha pagpatuman han bag-o nga LPTRP Ordinance.
Mayda daw manggud pira nga mga balaod nga waray nira kasusunod kun diin ginpahibaro hira ha City Government han Land Transportation Franchising and Regulatory Board (LTFRB)—sobra usa katuig na an nakalabay, nga kun tugutan ngani an usa nga munisipyo o Local Government Unit nga makasulod ha downtown area han syudad in kinahanglan nga tugutan gihapon an iba o ngatanan nga karuyag sumulod ha downtown.
Nagpahimatngon naman an LTFRB nga dire hira pwede mamili hin usa la nga lugar o transportasyon nga papasudlon ha syudad.
Dugang pa ni Romualdez, haa usa nga pag-aram in nakit-an nga bisan daw an usa la nga munisipyo nga nasulod ha syudad in kaparehas na hin sobra 100 nga sarakyan an kadamo kun diin nagreresulta hin traffic congestion.
Samtang, nangaro naman ine hin despensa mahitungod han kakulangan han pagpapasarang han impormasyon ha publiko kasumpay han nahitabo nga pagbabag-o han ruta nga gin-implenta kakuop nga adlaw, Setyembre 5.
