Ginsapubliko na han National Mapping and Resource Information Authority (NAMRIA) an opisyal nga administrative map han Pilipinas nga klaro nga nagpapakita han West Philippine Sea.
Subay ha pahayag han NAMRIA, an mga opisyal nga mapa ngan nautical charts han nasud in importante ha pagduon ngan pag-atiman han maritime jurisdiction han Pilipinas ha WPS.
Tikang ha hadton 2012, ha ilarom han Aquino administration, pormal na nga ginagamit han gobyerno an ngaran nga “West Philippine Sea” ha mga publikasyon, ngan ine in padayon nga iginbubutang ha ngatanan han opisyal nga mapa ngan charts.
Igin eksplikar han ahensya nga an mga materyales in ginagamit han mga mariners, planners, researchers, ngan magkaduru-dilian nga institusyon ha sulod ngan gawas han nasud para ha navigation, geographic information, ngan safety at sea.
Kadungan hine, ginpahayag han NAMRIA nga an exclusive economic zone (EEZ) han Pilipinas in naabot kutob 200 nautical miles tikang ha archipelagic baselines, subay ha Republic Act 9522. An mga datos in subay ha precise geospatial data nga nabulig ha sakto nga pagtudlok han maritime limits.
Gin klaro gihapon han ahensya nga an ira mga nautical charts in nagsusunod ha international hydrographic standards ngan iginpapasa ha mga international technical bodies sugad han International Hydrographic Organization, agud mahilakip an datos han Pilipinas ha global maritime record.
Duon han NAMRIA, an ira mandato in maghatag hin accurate ngan reliable geospatial information para ha nasud, nga importante ha maritime safety, environmental management, disaster preparedness, ngan dokumentasyon han national territory.
Dugang pa, padayon nira nga dedepensahan na mga mandato kumo suporta ha national sovereignty ngan ha sakto nga pagmamangulo han mga karikuhan han nasud.
