NAVAL, BILIRAN – Naugbaw hin sunog an usa nga mall ha Naval, Biliran dida han tikaurudto han nakalabay nga adlaw, Abril 9.
Nahireport an insidente ha Naval Fire Station pinaagi han pag-walk in han usa nga concern citizen banda pasado alas-12 han udto han nasabi nga adlaw.
Sumala kan Naval, Biliran Post Incident Commander, Atty. Mario Lydinno Opena, dayun naman nga nakaresponde an bombero ha insidente kun diin labot pa han bombero ha nasabi nga bungto in bumulig gihapon an bombero han mga kahigrani nga munisipyo mahitungod ha nagin kahaluag han sunog.
Dugang pa ni Opena, ginbabana-bana nga maabot ha sobra-kulang 1,000 sqm an kahiluag han mall ngan duha ka-andana an kahitaas hini.
Nagawas naman ha imbestigasyon nga dire ha mismo nga mall nagtikang an sunog kundi ha usa nga department store ha luyo hini nga an mga baligya in mga dry goods sugad hiton banig, ulunan, plastic wares, gadgets, ngan iba pa.
Ha inisyal nga imbestigasyon, usa nga generator set han department store an gintikangan han sunog mahitungod ha pag-overheat hini, kun diin dayun naman nga nagsarang an kalayo ha mga kasapit hini hasta nga umabot ha kasapit nga mall nga nagresulta hin dako nga danyos.
Umabot ha purluminos P44 milyon an ginbayaan nga danyos han nasabi nga sunog, kun diin kalakip na gihapon hini an danyos tikang han bug-os nga mall ngan an department store nga gintikangan han sunog, sugadman an mga kasapit pa hini nga nadabi han insidente.
Samtang, waray naman nahipatik nga namatay ha sunog pero upat an nahirekord nga nasamaran—duha tikang ha mga responders, usa nga volunteer, ngan usa nga sibilyan.
Ha lain nga bahin, ginmalatumat ni Opena nga mayda na hira nakalatag nga relocation area para han mga apektado nga tenants, mayda gihapon nakaandam nga bulig-pinansyal para ha mga ini, sugadman naghatag gihapon hin bulig an abogado han munisipyo ha mga tenants nga mabug-os utro an ira mga nasunog nga dokumento.
Gin klaro naman ni Opena nga waray kamatuuran an nagsasarang nga notisya ha social media nga waray makaresponde an bombero han Naval mahitungod nga waray ini sulod nga tubig, ha kamatuuran daw, dayun ini nga rumesponde mahuman nga makarawat an report ngan pira la kaminutos in nakadto na ini dayun ha lugar han sunog.
