TACLOBAN CITY – Maabot ha 50 nga mga locally stranded individuals (LSI) an nagkaulpot ha Eastern Visayas pinaagi han Hatid Tulong Program ha pangunguna han Philippine Coast Guard (PCG) ngan Bureau of Fisheries and Aquatic Resources (BFAR).
Sumala kan Edmar Petallana, OIC han Fisheries Management, Regulatory and Enforcement Division, gamit an multi-mission offshore civilian patrol vessel han BFAR in nagpakauli na ha ira tagsa tagsa nga probinsya an 50 nga mga LSIs nga tikang ha magkadurudilain nga parte han Manila.
Ha mao nga ihap 29 dinhi in mga residente han Albuera, Calubian, Palompon, Mayorga, Abuyog, Dagami, Jaro, Bato, ngan Lapaz ha Leyte; 3 ha probinsya han Biliran; 2 ha Northern Samar; 12 ha Southern Leyte; ngan 4 ha Samar.
Mababaruan nga ini na an ika-4 nga batch han mga LSI nga nagkaabot ha rehiyon pinaagi han pagbinuligay han BFAR ngan iba pa nga mga ahensya han gobyerno.
