TACLOBAN CITY — Mas guipahuruhugot han Leyte Police Provincial Office an seguridad ha pamilya han anay Albuera, Leyte Mayor Rolando Espinosa mahuman na-downgrade han Department of Justice (DOJ) an kaso nga murder ala kontra ha mga kapulisan nga nagbuhat hin raid ha namumutangan nga silda han anay mayor.
Sumala kan Leyte police provincial director Sr. Supt. Norberto Tuazon, nga “well-secured” an pamilya Espinosa ngan nagpapadayon la guihapon an 24 oras nga pagbabantay ha ira han duha nga police officers.
Nahibaruan tikang ha abogado han pamilya Espinosa nga nababaraka an mga ini ha ira katalwasan labis na ha pagkayana nga napaubos na hin two counts an kaso nga murder han mga akusado nga kapulisan han CIDG.
Manunumduman nga dida han nakalabay nga Mayo 29, 2017 guinpagawas han Department of Justice (DOJ) an resolution nga na-downgrade an murder case ha kaso nga homicide ala kontra kan Supt. Marvin Marcos ngan ha 18 nga personnel han Criminal Investigation and Detection Group (CIDG) mahitungod ha kawarayan hin ebidensiya nga magpapatuod nga an krimen in guin planuhan.
