TACLOBAN CITY – Mapasinalamaton ngan positibo an mga persons with disabilities (PWDs) ha syudad han Tacloban ha livelihood program nga ira matatagamtaman tikang ha city government ngan ha Department of Science and Technology (DOST).
Sumala kan Raymund Gaspay, presidente han PWD Workers Association ha Tacloban, ha ira gintambungan nga meeting, ginhubad an mga plano para han pag-implementar han livelihood programs para ha ira ngan an pagtitindog han livelihood center para ha mga PWDs nga nahimumutang ha Poultry Section ha merkado han syudad.
An paghingayad ngan pagpapaupay han livelihood center in papangunahan han city governmetn samtang an DOST naman an nakatuka ha paghatag han mga makinarya nga kikinahanglanon para ha food production o processing han mga PWDs.
Sumala pa kan Gaspay, mapasinalamaton hira ha mao nga pitad han city government ngan han DOST, tungod nga dako ini nga bulig para ha ira agud nga maipakita nga ha kaluyo ha ira mga disabilidad ngan limitasyon in mayda hira kapas nga magpakabuhi ngan makabulig ha ekonomiya han syudad.
Nahibaruan nga maabot ha 2, 300 an ihap han mga rehistrado nga PWDs ha bug-os nga syudad han Tacloban ha pagkayana.
