TACLOBAN CITY — Dead on the spot an usa nga lalaki mahuman nga pagpamusilon han waray pa makilal-e nga suspek ha Brgy Binulho, Javier, Leyte.
Ginkilala an biktima nga hi Norlito Naraja, 50 anyos an pangidaron, ngan residente han mao nga barangay.
Sumala kan P/Capt. Ernie Rocha, hepe han Javier MPS, subay ha ira imbestigasyon nga ugsa nga manabo an mao nga insidente in nag-inom anay an biktima kaupod an iya sangkay han magsarit ini nga magawas la pagihi.
Pira ka segundo an nagkalabay in nakabati an mga residente hin upat nga boto hin pusil ngan nakitan an biktima nga nahigda, waray na kinabuhi ngan ha likod hini in may nakabutang nga plakard nga may surat na “Huwag Tularan, Tulak Yan! Ikaw Ang Susunod!” ngan 1 ka sachet hin gintutuuhan shabu.
Ginpapag-adman pa naman kun may kalabutan ba ha pulitika an pagpataya ha biktima tungod nga ini in usa nga su-ok nga supporter han usa nga kandidato.
Ha pagkayana in nagpapadayon pa an imbestigasyon han mga kapulisan kasumpay ha mao nga insidente.
