SAN MIGUEL, LEYTE – Patay an usa nga lalaki mahuman nga bumunggo an ginmamanehuan nga motorsiklo ha nasusunod hini nga dump truck ha may bypass road han Sitio Kasagingan, Brgy. Bairan, San Miguel, Leyte dida han nakalabay nga adlaw.
Ginkilala an biktima kan alyas Turoy, 47-anyos an pangidaron, nagmamaneho han motorsiklo, ngan residente han Brgy. Guinciaman, San Miguel, Leyte.
Samtang, ginkilala naman an drayber han dump truck kan alyas Maymay, 25-anyos, ngan residente han Brgy. 106, Sto. Niño, Tacloban City.
Basar ha imbestigasyon, magsunod an truck ngan motorsiklo, kun diin nauuna an truck ngan nasunod an motor, tipakadto ha Guinciaman nga area.
Ha pagbiyahe han mga ine, gin aalegar tigda nga umundang an dump truck rason han pagbunggo han motorsiklo ha luyo han truck.
Nag-angkon naman hin kasamdan ha ulo an drayber han motorsiklo mahitungod nga bumunggo ini ha metal han luyo han truck.
Ginpadara pa an biktima ha Eastern Visayas Medical Center (EVMC) agud tagan hin medikal nga atensyon, buhi pa naman an biktima ha pag-abot ha hospital pero mahitungod han duro nga impact han pagbunggo in waray na ine umilob.
Samtang, umiskapo naman an drayber han truck ngan hasta yana in ginpapamiling pa.
