TACLOBAN CITY – Talwas nga na-rescue han mga otoridad han usa nga sumaka ngan nagbitay-bitay ha 4th floor han usa nga mall ha Abucay, Tacloban City, kakulop han banda alas-10 han aga.
Ginkilala an lalaki kan alyas Jumong, 36-anyos an pangidaron, ngan residente han Sagkahan, Tacloban City.
Subay han pakighimangraw han Bombo Radyo Tacloban kan Tacloban City Police Station 2 Station Commander, PMaj. Shenna Layog, hubo-lubas nga nagdalagan tipa-sulod han mall an nasabi lalaki kun diin sumulod ine ha locker room han mga empleyado han nasabi nga mall, kun diin mahitungod han reaksyon han duha nga empleyado in dumalagan naman daw tipakadto han 4th floor han mall.
Kun diin, ginbuong hine an usa nga bintana ngan naglatay tipakadto han may billboard frame ngan naglaru-lambitay.
Madagmit naman nga nagresponde an mga otoridad ngan gin aghat an lalaki nga lumusad pero waray ine bumali.
Paghagos naman han haros usa ka-oras nga pagbinitay-bitay hine in nahulog an lalaki tipakadto han mga kutson nga iginlatag han mga rescuers.
Gin aalegar naman nga mayda problema ha panhuna-huna an lalaki, kun diin nahibaruan gihapon ha paryente hine nga mayda ine gintutumar nga maintenance.
Samtang, pwede naman nga makasuhan kaparte han Alarm and Scandal an lalaki kun magpasaka hin kaso an nasabi nga mall.
