TACLOBAN CITY- Naaktuhan han kapulisan an usa nga lalaki nga nangangawat ha usa nga tindahan ha Brgy. 1 & 4 Bonifacio St. syudad hiton Tacloban.
Ginkilala an tagreklamo, tag-iya han tindahan nga hi Amorcia Enfectina, 50-anyos an pangidaron, inasaw-an ngan residente han Brgy. 91, Abucay Tacloban City.
Ginkilala naman an suspek nga hi Jake Almenario, 22 anyos an pangidaron, ulitawo, usa nga pedicab driver, residente han Brgy. 43-B Tacloban City.
Basar han inisyal nga imbestigasyon han kapulisan, sumulod an suspek ha tindahan han tagreklamo, kun diin iya gindistroso an purtahan han mao nga tindahan agud nga makasulod hiya. Nakagmata na tag-iya han tindahan mahitungod han aringasa, ngan dayon ini nga tumawag ha kapulisan.
Naaktuhan naman han kapulisan an mao nga suspek nga nakada pa ha sulod han tindahan.
Dayon naman ini nga gindakop ngan gindara ha Abucay Police Station 2 Tacloban City Police Office.
Samtang, waray may nakuha han suspek ha mao nga tindahan.
