ODD NEWS- Nakakarawat hin 110 nga emergency hotline nga tawag tikang han Sendai, Japan han nakalabay nga Mayo 19 yana nga tuig, tikang ha usa nga babaye nga teenager.
Ine in agud nga mag-report nga naka-kita hiya hin usa nga lalaki nga mayda kapot nga pisaw ha Sendai train station.
Mababaruan nga han mga nakalabay nga tuig, may mga insidente han panbubuno ha sulod han tren ha Japan sanglit nga dagmit nga rumesponde an mga kapulisan ha mao nga report.
Pag-abot han sobra usa kadosena nga kapulisan ha Sendai station, nakahimangraw nira an teenager nga nag-report ngan ginklaro nga sayop an nakit-an hine, subay ha upod hine nga dire pisaw o sundang an kapot han usa nga lalaki kundi usa nga “Garakei” o “flip phone”!
An garakei o flip phone in kadaan nga klase han cell phone nga na-aabre ngan nasasara nga baga-baga hin usa nga kabibe.
Nauso ine ha Japan ugsa nga maibento an mga smartphone.
Mababaruan nga kun naka-abre ine, makikit-an nga manipis an pustura hine ngan pwede makapagkamalan nga pisaw han mga kabataan nga waray hiabot han sugad nga teknolohiya.
Agud nga makasigurado nga dire pisaw an ira nakit-an ginbeling nira ha CCTV an mao nga lalaki agud nga matudlok an pangilal-an hine.
Dayon naman nga nabilngan an lalaki ha sunod nga stasyon han tren ngan sumige naman ine nga inspeksyunin an iya bag, waray may nabilngan nga pisaw kundi an usa nga kadaan nga flip phone.
Umaro naman hin despensa an teenager nga naghatag hin sayop nga report ngan umaro gihapon ine hin pasaylo ha mga kapulisan nga nadistorbo ha ira mandato nga trabaho.
