Viral yana ha social media an usa nga grupo han mga kalalakin-an nga pulis ha Thailand mahuman hira mag-undercover kumo usa nga grupo han mga babaye nga performers agud maaresto an usa nga notorious nga drug pusher.
Igin kalipay han mga netizens an iginpaangbit nga litrato han Tha Luang Police Station ha Facebook kun diin makikita nga nakasul-ot hin mga maglamrag nga bado pansayaw an mga opisyal mahuman an ira malinangpuson nga operasyon.
Ha unom nga pulis nga nakada ha litrato, usa la ha ira an tinuod nga babaye. Gindumara han mga otoridad an kakaiba nga disguise ha butnga han usa nga street festival agud dire makatunog an suspek nga ginkilala ha ngaran nga “Mekha Fa-wap-wap”.
Mahitungod ha malaksi nga pag-raid han kapulisan, narekober tikang kan Mekha an 53 kabug-os nga methamphetamine pills, sobra 200 kabug-os nga gudti nga plastik bag nga pagbubutangan han mga tingi-tingi nga droga, ngan usa nga cellphone.
Naaatubang an suspek ha mga kaso nga pagbabaligya hin category one narcotics ngan illegal nga pagpapadalagan han slot machine.
