TACLOBAN CITY — Ginpusil an usa nga lalake nga aada ha igo nga pangidaron han iya la mismo kalugaringon nga magurang ha Brgy. San Francisco Street ha siyudad han Catbalogan City.
Kinilala an biktima kan Nicolas Picson Iguda Jr, 39 anyos, waray asawa samtang kinilala an suspek nga iya la mismo bugto nga hi Erik Picson Iguda, 44 anyos nga pareho nag-uukoy ha nasabi baranggay.
Sumala kan PLt. Nelson Lapeciros, Deputy Chief of Police han Catbalogan Police Station, an mao nga insidente in away magbugto matungod la ha deri pagkaka-intindihay.
Basar ha inisyal nga imbestigasyon, nagkadeperensiya an biktima ngan anak han mao nga suspek kun diin gin-ugupan han suspek an iya anak.
Matungod nga umugop an suspek ha iya anak in ginpusil ini an iya kalugaringon manghod kun diin naigo an biktima ha iya tagiliran.
Dagmit naman ini ginkadto ha ospital ngan ha pagkayana in nagpapaupay ngan stable na an kabutangan han biktima.
Ha pagkayana in naghuhulat pa an mga otoridad kun igpapadayon ba han biktima an pagsasalawad hin pormal nga reklamo kontra ha iya magurang.
