Maduon nga ginbatikos ni Senate President Pro Tempore Panfilo “Ping” Lacson an paggamit han mga “ad hominem” o personal nga pag-atake kontra ha mga opisyal ngan magbabalado nga nagdidig-on para ha soberanya han Pilipinas ha West Philippine Sea (WPS).
Ine an nagin baton ni Lacson mahuman nga magpahayag ni Rep. Paolo Henry Marcoleta nga himuon nga bala han kanyos an usa nga tagapagyakan han Philippine Coast Guard ngan pira nga senador, ha oras nga magdeklara hin gyera an China kontra ha Pilipinas.
Kasumpay an mga pahayag han bata nga Marcoleta mahuman nga batikuosn an iya tatay mahitungod ha suhestyon hine nga ig surender an Kalayaan Island Group (KIG).
Kasunod hine, gin aghat ni Lacson an nakababata nga Marcoleta nga bisitahon an Pag-asa Island ha Kalayaan Island Group nga kaparte han probinsya han Palawan, agud personal nga makita ngan maeksperyensya an maupay ngan aktibo nga lokal nga pangobyernuhan han lugar.
Gintagan-duon gihapon han senador nga an KIG in usa nga munisipalidad han Palawan nga may-ada buhi nga kumunidad ngan gobyerno, kun diin iginpaangbit pa hine nga ha iya pagbisita didto in nakita mismo niya an paghiru-hirani han mga barko han Chinese Coast Guard ha lugar, ngan gin aghat an mga nakatudlok nga militar nga dire umundang ha pagdepensa ha teritorya han nasud.
Manunumduman nga ha usa nga pahayag ha internet dida han Pebrero 6, gintawag han nakababata nga Marcolet nga “traydor” an mga nagdidig-on para ha WPS ngan ginbubuhatang la daw ha kadelikaduhan an mga Pilipino.
