TACLOBAN CITY – Ginduduso han Philippine Kiteboarding Tour an turismo han siyudad han Borongan sumala kan Mayor Jose Ivan Dayan Agda.
Sumala ha alkalde nga an mao nga event in nagpaparig-on gihapon ha reputasyon ngan pangilal-an han Borongan kumo usa ha mga “key sports and adventure destinations” han nasud.
Panuyuan gihapon hini nga event in agud igduso an sports tourism ngan an maghusay nga destinasyon sugad nala hiton mga dagat ngan natural nga pamasyadahan han mao nga siyudad.
Samtang malinampuson naman nga gindumara an Kiteboarding Tour nga nagtikang dida han nakalabay nga Nobyembre 29 kutob dida han Disyembre 1 nga kun diin ginbuhat ini ha Baybay Beach.
Ginpartisiparan naman ini han maabot 50 nga mga kiters nga tikang ha nasud Ireland, Estonia, Spain, Germany, Lithuania, China, Thailand ngan sugad man mga lokal nga kiters tikang ha Boracay, Palawan, Puerto Galera, Cagbalete, Cebu ngan Manila.
An kiteboarding in usa nga sport nga kun diin, nasakay ha usa nga gutiay nga surfboard an kiter nga ginpapaandar naman gamit han dako nga banog-banog.
