TACLOBAN CITY – Kapot na han mga kapulisan han Tacloban City Police office an usa nga kawatan han motor samtang narekober naman han mga otoridad an ginkawat hini.
Natabo an insidente dida han kaagahon han mga nakalabay nga adlaw nga kun diin, nakakarawat an mga kapulisan hin report nga may nawawara nga itom nga Rusi TC 150 ha may Sen. Enage Street, Brgy. 1 & 4, Tacloban City.
Base han impormasyon nga ginpark han biktima nga ginkilala kan alyas “Leo,” 50-anyos an pangidaron, ngan residente han Brgy. 6-A, Tacloban City, an iya motor ha nasabi nga lugar ngan mayda niya kakadtuon ngan waray hini kabantayi nga nakabutang pa ngay-an an susi hini ha iya motor.
Pagbalik hini in nawawara na an iya motor kun diin dayon ini nga umaro hin bulig ha mga kapulisan.
Dida han rumesponde an mga kapulisan ha usa nga riot nga natatabo ha Cong. Mate Avenue, Brgy. 91 Abucay nakita han mga kapulisan nga an usa nga indibidwal in nagdadagmit lumakat gamit han usa nga motor pakakita hini han ira patrol car.
Han ira panginanuon in waray plate number ngan waray dokumentonga iginpakita an indibidwal ha mga kapulisan, ngan nasabtan han mga ini nga parehas gihapon an nasabi nga motor ha report nga ira nakarawat.
Dayon nga gindakop naman han mga kapulisan an suspek nga ginkilala kan alyas “Jade,” 33-anyos, nga usa nga parking attendant. Na-beripika naman han tag-iya han motor an iya behikulo kun diin, gin-uli hini han mga kapulisan mahuman nga ginturn-over an suspek ngan an motor ha Tacloban Police Station 2.
Ha pagkayana in maatubang naman an suspek ha kaso nga carnapping.
