NATIONAL – Utro nga naungkat ha Senado an kaso han Mindoro Oil Spill ha ginbuhat nga pagdungog han Senate Committee on Environment and Natural Resources and Climate Change.
An nasbai nga komite in nag-iimbestiga ha nahitabo nga paglunod han MT Terra Nova ha Limay, Bataan dida han Hulyo kadungan han paglasurbo han Super Typhoon Carina.
Ginpakiana naman ni Sen. Francis Tolentino ha Philippine Coast Guard kun mayda na nakasuhan ha Mindoro Oil Spill nga nahitabo dida pa han nakalabay nga tuig.
An kumpanya manggud nga nag-charter ha MT Princess Empress in parehas nga kumpanya nga nag-charter gihapon ha Terra Nova – SL Harbor Bulk Terminal Corp.
Karuyag ni Tolentino nga mahibaruan kun napagbaton na an tag-iya han MT Princess Empress mahitungod ha yinukot-yukot nga paru-pangisda nga naapektaran, samtang dako nga parte han katubigan ngan baybayon naman an naguba hin pira kabulan mahitungod han oil spill.
Basar ha datos han National Disaster and Risk Reduction Management Council (NDRRMC), umabot ha 43,699 pamilya an naapektaran ha pagtagas han lana tikang ha MT Princess Empress, samtang an danyos nga durot hine in umabot ha P4,929,242,581.74.
