PALO, LEYTE – Nagdumara hin Send-Off Ceremony an Police Regional Office 8, komo parte han Inter-Agency Response, kun diin ginpadara an pipira nga personnels han Region 8, ha Bicol Region, agud makabulig han relief and rescue operations dara han epekto han Bagyong Kristine.
Ginbuhat ini ha Police Regional Office 8 Grounds, Camp Sec. Ruperto K. Kangleon, Palo, Leyte, dida han nakalabay nga adlaw, kun diin 150 nga mga personnels tikang ha Philippine National Police (PNP), lakip an 21 nga miyembro han Regional Maritime Unit 8, an ginpadara ha Bicol Region.
6 naman nga personnels tikang ha Philippine Coast Guard (PCG) ngan 16 tikang ha Bureau of Fire Protection (BFP) an gin-deploy komo parte han koordinado nga paningkamot para masiguro an kumprehensibo nga suporta ha mga operasyon ha Bicol Region.
Nag-mobilisar naman hin upat nga mga sarakyan an Police Regional Office 8, lakip an tulo nga trak, usa nga bus, ngan usa nga Toyota Hi-Lux. Kun diin, ini nga mga sarakyan in magpapakusog han paglihok ngan operational efficiency han mga security personnel durante han operasyon.
Kumpiyansa naman hi Police Regional Office 8 Regional Director, Police Brigader General Jay R. Cumigad han kaandaman ngan dedikasyon han mga ginpadara nga personnels.
Gintagan liwat niya hin duon an importansya han ira dedikasyon para han pagresponde ngan pagbulig ha Bicol Region.
Samantang, gin-siguro naman han Philippine Regional Office 8 ha publiko nga an seguridad ngan operasyon ha bug-os nga Eastern Visayas in nagpapabilin nga madig-on, ngan may ada sakto nga personnels nga gin-deploy agud masiguro an kamurayaw ngan kaayusan ha bug-os nga rehiyon.
Ginpaangbit naman han Assistant Chief han Regional Women and Children Protection Desk, Police Major Analiza C. Arneza an iya pasasalamat han serbisyo, dedikasyon, ngan katapangan han mga personnel.
Dugang pa niya in, dire la hira basta frontlines responders kundi hira in simbolo han paglaom, para han mga tawo nga ginkukuri durot han Bagyong Kristine.
Magpapadayon naman an koordinado nga pagresponde han iba iba nga ahensya kutob matapos an ngatanan nga operasyon ha Bicol Region. (VIA Bombo Shiela Encio)
