TACLOBAN CITY – Nakaandam na an mga kapulisan ha probinsya han Leyte ha pagpahugot han mga protocols nga igpapatuman ingkaso nga maibalik na ha General Community Quarantine (GCQ) an bug-os nga Sinirangan Bisayas.
Sumala kan Pol. Col. Rodelio Samson, Provincial Director han Leyte Police Provincial Office (LPPO), waray magiging dako nga pagbabag-o han igpapatuman nga mga protocols pero igbabalik na ha kada bungto an border checkpoints.
Ini in para malimitahan an gius han mga katawhan ngan masiguro nga an magpapakagawas la ha ira mga panimalay amo an may mga importante nga tuyo o lakat.
Dugang pa hini nga yana nga mayda na authority an mga LGUs o mayor nga magpatuman hin lockdown in posible nga magkaada na gihapon hin checkpoint han mga kapulisan ha mga barangay labi na gud adton may kumpirmado nga mga kaso han COVID-19.
Nanawagan naman ini ha publiko nga magsunod ha pagpatuman han mga protocols han GCQ agud mapugngan an mas paghitaas pa han COVID-19 cases.
