TACLOBAN CITY – Iginbasura han Tacloban City ngan Leyte Provincial Prosecutor’s Office an reklamo nga perjury ala kontra kan Leyte 2nd district board member aspirant Raissa Villasin.
An reklamo in gin-file han igkasi hini kandidato ka board member nga hi Nestor Abrematea ngan duha nga iba pa tungod han gin-aalegar nga “untruthful statement under oath” dida han iya certificate of candidacy nga gin-file han nakalabay nga Oktubre 11, 2018.
Ha CoC ni Villasin gin-deklara hini nga residente hiya han Barugo, Leyte hin duha katuig ngan 7 kabulan san-o umabot an May 13 midterm elections.
Subay ha gin-file nga complainants nagawas nga diri nagbabayad hin bisan ano nga realty taxes hi Villasin ha Barugo ngan ini in incumbent nga konsehal han syudad han Tacloban.
Bumotos pa ini ha syudad dida han May 14, 2018 barangay and SK elections.
Pero gindig-unan ni Raissa nga hiya in tinuod nga residente han Barugo kon diin ginpresentar pa hini an iya certification nga pirmado han kapitan han Brgy. Cuta bungto han Barugo.
Tikang daw han katunga-tunga han tuig 2015 kutob Enero 2016, nag ukoy daw hiya ha Barugo kaupod an iya kag-anak tungod nga gin aayad an ira balay.
Ginpanigan han korte hi Villasin ha pareho nga kaso ha prosecutor’s office ha Tacloban City ngan Carigara, Leyte kon diin subay ha desisyon nga waray intensyon hin pagbuwa an kampo hini ngan may kamatuuran an iya mga statements.
Tungod nga incumbent city councilor han Tacloban City an respondent ngan bumotos ini ha nakalabay nga May 14, 2018 pupwede hiya bumotos ha iba nga lugar pero iba iton iya residensiya.
Nag issue gihapon hin certification an Provincial Election Officer nga nagpapamatuuod nga hi Villasin in bonafide nga kandidato kumo myembro han Sangguniang Panlalawigan Leyte-2nd District.
Ha pagkayana in gin- aandam naman han kampo hini an mga kaso nga perjury, cyberlibel, unjust vexation ngan harassment nga igpapasaka ala kontra han mga complainants.
“We do not want to abuse the legal system. If there will be other evidence available, then we can use it,” pahayag ni Atty. Nicco Villasin abugado ngan bugto ni Raissa.
Sumala pa kan Raissa nga ada hira ha panig han kamatuuran ngan padayon hiya nga mangangampanya. Ini an maghahatag haiya hin higayon para klaruhon nga waray hiya ka-disqualify.
“We are on the side of truth. We continue on campaigning and it never deterred me. It gave me an opportunity to clarify that I was not disqualified from running for office,” pahayag ni Raissa
