NATIONAL NEWS– Gindiwara han kampo ni anay Department of Public Works and Highways (DPWH) engineer Brice Hernandez an report nga recantation o pagbawi niya han iya testimonya kasumpay ha maanomaliya nga flood control projects.
Subay ha iya abogado nga hi Atty. Ernest Levanza, waray kamatuoran an ginpahayag nga recantation ngan ira klaklaruhon an isyu ha hearing han Senate Blue Ribbon Committee ha Enero 19.
Ginmalatumat naman ni Sen. Panfilo Lacson, chair han Blue Ribbon Committee, nga paghihimangrawan ine ngan nagpahimatngon nga hino man an magbabawi han testimonya in posible nga umatubang ha perjury matungod ha iya ginsumpaan nga pahayag.
Ginklaro gihapon han Department of Justice (DOJ) nga waray na hira nakakarawat nga affidavit tikang kan anay DPWH District Engineer Henry Alcantara nga nagbababawi han iya testimonya.
Subay ha ahensya, waray gihapon nakasurat ha iya counter-affidavits nga ginbabawi niya an nauna nga pahayag, ha kaluyo nga anay na gihapon hine gindiwara nga dabi hiya ha ghost flood control projects.
