ODD — Usa nga kahon nga mayda sulod nga mga pugot nga ulo hin tawo an ginkawat ha nakaparada nga freight company truck ha Denver, Colorado, U.S.A.
Subay ha report han CBS Denver, ginsakban an delivery truck samtang nakaparada ini ha East Denver Central Park dida han nakalabay nga Huwebes (Marso 3).
Kahuna han mga otoridad nga usa la nga petty theft an panhitabo pero han masabtan nira nga mga ulo an sulod han ginkawat nga kahon, naglunsar na hira hin imbestigasyon.
Napag-araman nga an ginkawat nga kahon in mayda dako nga label nga nagsesering nga “Exempt Human Specimen” nga an karuyag signgon in gagamiton ha medical research an sulod nga human body parts hini. Matungod hini, mayda hurob-hurob an mga otoridad nga an kahon talaga an tuyo han mga kawatan.
Ha pagkayana, waray pa naaaresto ha mao nga kaso nga padayon pa ha pag-iimbestiga an mga otoridad agud madakop an mga kawatan ngan ma-recover an mga ginkawat nga ulo.
