TACLOBAN CITY – Nagpapabilin nga positibo ha red tide toxin an mga kadagatan han Leyte, Leyte, ngan Matarinao Bay (General MacArthur, Quinapondan, Hernani, and Salcedo), subay ha pinakabag-o nga red tide advisory han Bureau of Fisheries and Aquatic Resources (BFAR) Eastern Visayas.
Karuyag sidngon, nagpositibo ha Paralytic Shellfish Poison o gintatawag nga red tide an mga shellfish meat samples nga ginkolekta tikang ha nasabi nga mga kadagatan.
Mahugot nga igindidire an panguha, pagkaon, ngan pangolekta han ngatanan mga klase hin pangti-on o shellfish ngan Acetes sp., alamang o hipon tikang ha nasabi nga kadagatan.
An hin-o man nga magtatalapas ha nasabi nga shellfish ban in mag-aatubang hin kaangayan nga sirot ngan penalidad.
Samtang, an isda, nu-os, pasayan, ngan masag nga tikang hine nga kadagatan in pwede naman igkonsumo basta siguraduhon la nga presko ngan tatanggalan hin mga laman-loob sugad han tina-e ngan hasang, sugadman in huhugasan gamit an running water.
