TACLOBAN CITY – Basar ha datos, kaurugan nga nakakakuha han sakit nga Alzheimer’s disease an mga kababayen-an mahitungod nga mas damo an ihap han mga kababayen-an nga gina-outlive an mga male counterparts hini sugad man mas halaba an life expectancy han mga babaye.
Bisan man kun kaurugan nga naduduktan hini in an mga kalagsan, sumala kan EVMC Medical Specialist IV Bernabe in pwede magtikang pagkamay-aada hin sakit nga alzheimer’s an usa nga tawo ha edad nga 30 anyos, samtang pag abot ha edad nga 65 anyos in aada ha 10% an risk factor nga magkaada hini nga sakit ngan puydi pa ini humataas ha 35% pag abot ha edad nga 80, sugad man 50% pag abot hin 90 anyos.
Subay kan Eastern Visayas Medical Center Medical Specialist IV Dr. Mae Christine Agatha B. Bernabe, an Alzheimer’s disease in usa nga progresibo nga sakit nga nakakaapekto ha utok sugad man nakakaapekto ini ha memorya hiton usa nga tawo rason nga aapektaran an kapasidad pag himo han mga day-to-day activities.
An mga sintomas han nasabi nga sakit in an pagiging limtanon, kawaray na kapasidad nga himuon an mga trabahuon, kalipat ha petsa han adlaw, bulan, ug tuig, diri kasigurado han mga direksyon, sugad man nagiging moody, nag-iiba an kinaiya ngan personalidad.
Pagklaro naman ni Bernabe ha mga nalilipat han Alzheimer’s ngan dementia in diri mag pareho an dementia ug alzheimer’s disease. An dementia in usa nga umbrella term, ngan an alzheimer’s in usa la ha mga klase ha ilarom han dementia sugad han vascular dementia, fronto temporal dementia sugad man an iba pa nga klase hin dementia.
Dugang pa hini, mas kilala an alzheimer’s mahitungod nga nasaka an ihap hini ha 60-70% han tanan nga kaso han dementia. (via Bombo Niña Magpili)
