MAASIN CITY – Nakiusa an Maasin City ha iba pa nga local government units (LGUs) ha bug-os nga nasud ha patapod nga sundon ngan igpatuman an Philippine Standard Time (PST)—an opisyal nga oras ha nasud nga gin-aatimanan han Department of Science and Technology (DOST)—pagdudumara ha ira pan-adlaw-adlaw nga trabahuon.
Iginpakita an nasabi nga patapod pinaagi han pagsunod ha Juan Time, usa nga digital clock nga igin butang ha public plaza agud magserbi nga basaranan han oras han mga residente. An orasan in igdudungan ha opisyal nga oras han bug-os nga kapuluan agud masigurado an pagkakapare-pareho han oras ha bug-os nga nasud.
Pinangunahan ni DOST Secretary Renato Solidum an paglulunsar han Juan Time Watch ha iya nagin pagbisita ha syudad ngan probinsya. Kaparte ine han iya inspeksyon ha magkaduru-dilain nga proyekto may paghisumpay ha agham, teknolohiya, ngan inobasyon nga pinondohan han ahensya.
Gintagan-duon naman ni Solidum nga an hin-o man nga dire masunod ha oras nga iginpapakita han Juan Time—labi na an mga kumpanya han pagbabalita ngan iba pa nga institusyon nga may paghisumpay ha pagtutudlok han oras—in pwede magbaton ngan kwestyunon ha korte.
Sumala ha project briefer, nagtikang an Juan Tine kumo usa nga adbokasiya, sobra usa kadekada na an nakalabay, nga panuyo aghaton an pagbabag-o han kultura pinaagi han paghahatag hin importansya ha oras.
Panuyo han inisyatiba nga pagdudrunganon an ngatanan han orasan ha bug-os nga nasud ha Philippine Standard Time (PST) ngan igduso an urusa nga pagbaton ha pagigin maagap, labi na ha pagrespeto ha oras han igkasi tawo.
Kumo opisyal nga taga-tudlok han oras ha nasud, ginsusuportahan han DOST–PAGASA an adbokasiya kumo kaparte han pagpapatuman han Philippine Standard Time Act of 2013, nga nagmamando ha ngatanan nga ahensya han gobyerno, mga kumpanya han pagbabalita, ngan ha publiko nga sumunod ha PST.
Sobra pa ha pagigin simbolo, an “Juan Time” in nagseserbi nga praktikal nga paagi agud hag-iron an disiplina, pagigin maagap, ngan kultura han pagigin maupay ha kumunidad ngan mga institusyon han gobyerno, sugadman agud mapakusog an pag-importante ngan pagrespeto ha oras han kada usa.
