Igin suhestyon han Iran nga manukot hin bayad ha mga barko nga naagi ha Strait of Hormuz kumo kaparte han kasabutan han Iran ngan Estados Unidos nga undangan an kasamok.
Subay ha usa nga hataas ng opisyal han Iran, karuyag han Tehran nga mahilakip ha permanenete nga kasabutan an katungod nga magpahamtang hin kabaraydan ha mga barko nga maagi ha nasabi nga agianan.
An kantidad han bayad in madepende ha klase han barko, kargamento, ngan iba pa nga kondisyon.
An Strait of Hormuz in usa nga makipot nga duruongan nga mayda kahilapad nga sobra-kulang 34 kilometro ha butnga han Iran ngan Oman, nga nagseserbi nga pangunahon nga ruta han haors 20% han suplay han lana ha bug-os nga kalibutan.
Syahan na nga ginmalatumat ni Iranian Deputy Foreign Minister Kazem Gharibabadi nga nagbubug-os an Iran ngan Oman hin usa nga kasabutan nga mag-oobliga ha mga barko nga kumuha hin permit ugsa makaagi ha Strait of Hormuz, Sumala hini, panuyo nga mapadagmit an pag-agi han mga sakayan-pandagat.
Gin kumpirma naman ini han Oman kun diin panuyo hini nga siguraduhon nga hapsay an agos han trapiko ha kadagatan, sugadman waray pa klaro nga kasabutan nga naipapasa.
Tikang han tikangan han Islamic Revolutionary Guard Corps an pagbalabag ha duruongan, gutiay nala an mga barko nga naagi hini. May-ada gihapon nga report nga mayda usa nga barko nga nagbayad hin $2 million agud makatabok, pero waray pa gihapon ini kumpirmasyon.
Subay ha shipping industry, waray pa ha kasaysayan nga an usa nga nasud in nanukot hin bayad para ha la tugutan nga makaagi ha kadagatan.
Umabuyon naman dinhi an United Arab Emirates kun diin ginmalatumat hini nga dire angay himuon nga bihag an anuman nga nasud para la makaagi ha Strait. Gin abuyunan gihapon ini han Qatar kun diin kinahanglan magpabilin ini nga bari ha ngatanan nga nasud.
Ha ilarom naman han United Nations Convention on the Law of the Sea, dire pwede manukot an mga nasud nga nakapalibot ha strait kabalyo han simple nga pag-agi han mga barko. Pwede la hira magpatuman hin “limited fees” para ha mga serbisyo sugad han pilotage o port assistance.
