TACLOBAN CITY– Mahugot nga ginmomonitor yana hiton City Agriculture Office an mga retailers hiton bugas ha merkado publiko hiton syudad.
Sumala kan Romelo Anade, Head City Agricultures Office Tacloban City, ira ginpapanginao kun an mga ine in nagsusunod ha Executive Order (EO) No. 118, nga ginpalusad ni Pangulong Ferdinand R. Marcos Jr. hadton Mayo 13, 2026, nga nagmamando hin temporaryo nga nationwide price ceiling nga PHP 50.00 kada kilo ha mga gin-aangkat nga bugas o regular/well-milled rice.
Dugang pa ni Anade, nga an nasabi nga mandato in nagpapanuyo nga pugngan an dire makatawo nga paghitaas han presyo ha pira nga mga merkado nga naisusumpay ha paghamubo hiton suplay.
Usa gihapon nga panuyo han pag patuman han nasabi nga EO No.118, in mabuligan an mga lokal nga parag-uma nga maibaligya an ira mga local rice ha merkado.
Gintagan duon pa ni Anade, nga an mandato in naka-pukos la ha mga nagbabaligya hiton imported rice, ngan gin-aaghat hine an publiko nga pananglitan baligyaan an mga ine hin lahos ha nakatalaan nga presyo, in abre an ira opisina kumarawat hin reklamo, agud nga matagan hin aksyon an mga singabot nga rice retailers.
Posible naman umatubang ha penalidad ngan maipasara an tindahan han mga nagtitinda hiton bugas, ha oras nga mapamatud-an ine nga dire nagsusunod ha nasabi nga mandato.
