TACLOBAN CITY – Maabot pa ha 73 an ihap han mga missing nga biktima han bagyong Agaton ha syudad han Baybay ngan 103 naman an nagpapabilin nga nawawara ha bungto han Abuyog, Leyte.
Sumala kan Lord Byron Torrecarion, Regional Director han Office of Civil Defense (OCD) Regional Office 8, padayon pa nga ginkukumpirma ha pagkayana an pangilal-an han mga patay nga lawas nga narekober ha mao nga mga lugar.
An mga ini in mga biktima han landslides ngan pagbaha ha Abuyog ngan Baybay City.
Ha pagkayana in nagpapadayon naman an rescue operations ha bungto han Abuyog samtang ginrekomenda naman han Mines and Geosciences Bureau (MGB) Regional Office 8 an pagpaundang han operasyon ha Baybay City tungod han ginkakabarak-an nga pagkakaada utro hin landslides.
Ha pagkayana in nagpapabilin naman ha mga evacuation centers an mga survivors han landslides ngan pagbaha ha Abuyog ngan Baybay City.
