TACLOBAN CITY – Gin anunsyo ni Tacloban City Health Officer, Dr. Jaime Opinion an pinakabag-o nga datos han Human Immunodeficiency Virus (HIV) ha syudad han Tacloban.
Sumala pa hine, tikang han Enero kutob Abril han presente nga tuig in sumaka na ha 23 an kabug-usan nga ihap han kaso han HIVm, kun diin an lima in nahipatik dida han Abril.
Gintagan-duon naman hine an nagtitikahitaas nga ihap han kaso han nasabi nga sakit dire la syudad kundi ha bug-os nga nasud.
Subay ha National statistics, nangunguna an Pilipinas ha may pinakadamo nga ihap han HIV cases ha Western Pacific region.
Dida han nakalabay nga tuig-2010, tag-unom nga kaso la han nasabi nga sakit an nahipapatik ha kada adlaw, pero dida han nakalabay nga tuig-2024 kutob ha syahan nga parte han tuig-2025 in naabot na ha 40 ngada ha 50 nga kaso an nahipapatik kada adlaw o kaparehas han 500-600% nga paghitaas.
Usa gihapon ha mga iginkakabarakan ni Dr. Opinion in an paghamubo han age group han mga naduduktan hine.
Tikang ha edad nga 25-34 anyos dida han tuig-2010, umubos ine ha 15-24 anyos yana ha presente nga tuig.
An mas makababaraka pa in mayda nahipatik nga kaso hin 12-anyos ha Palawan.
Samtang, 95% naman han HIV transmission in nahitatabo ha male-to-male contact kun diin pangunahon nga rason in an risk behavior han mga kabataan.
Kabahin hine in nanawagan naman ni Dr. Opinion in mas halawig nga pag-intindi, edukasyon, ngan partisipasyon han publiko ha pagbaton han nagtitika-‘grabe’ nga isyu han HIV ha syudad han Tacloban. (via Bombo Shiela Encio)
