NATIONAL NEWS– Ginpaboran han International Criminal Court an hangyo han kampo ni anay Pangulong Rodrigo Duterte nga igsuspender an desisyon han tribunal ha hangyo nga interim release kutob nga an mga defense lawyers in malatirok han tanan nga kikinahanglanon dokumento.
Ha iginpagawas nga majority decision, an Pre-Trial Chamber 1, nga ira iguugsod an pagpagawas han desisyon nga may kalabutan ha interim release in kutob nga makit-an han Chamber nga ine in sakto na.
Nasurat gihapon ha desisyon nga ginkontra ni Judge María del Socorro Flores Liera an ruling nga syahan na ginpagawas nira Judge Iulia Antoanella Motoc ngan Judge Reine Adélaïde Sophie Alapini-Gansou.
Subay ha Tribunal an interim release proceedings in nasusubay ha article 60(2) han Rome Statue nga an mga indibidwal nga may warrant of arrest in may katungod nga humangyo hin interim release.
Una na nga gin-apela ha abogado ni Duterte nga hi Atty. Nicolas Kaufman hadton Hulyo 14, 2025 nga an Pre-Trial Chamber in dire angay kilal-on an interim release kutob nga tanan nga dokumento in dire pa nira nakukuha.
Manunumduman han nakalabay nga Hunyo, ginhangyo han kampo ni Duterte ha ICC an interim release ha waray ngarani nga nasud.
