Huhukman na han Kamara de Representantes yana nga adlaw, Lunes, Mayo 11, hi Vice President Sara Duterte agud padig-onon an report han House Committee on Justice nga may-ada ”probable cause” ha reklamo nga impeachment kontra ha Bise Presidente.
Kasunod ini han pira ka semana nga hearing ngan pag eksamin han mga dokumento ngan ebidensiya kanit ha isyu han Statement of Assets, Liabilities, and Net Worth (SALN), Anti-Money Laundering Council (AMLC) records, confidential funds, ngan iba pa nga alegasyon kontra ha bise.
Usa pa nga paghihingadayan ha plenaryo an committee report ngan resolusyon nga mag-aabre hin dalan agud maipadara ha Senado an upat nga Articles of Impeachment para ha paglilitis.
Sumala kan Justice Panel Chairperson ngan Batangas Rep. Gerville Luistro, andam na ang komite nga depensaran ha plenaryo an ira mga findings para makakuha hin sadang nga botos.
Mababaruan nga una na nga gin aprubaran han House Committee on Justice an impeachment complaints kontra kan Duterte ha botos nga 53-0 para ha probable cause ngan 55-0 naman para ha committee report han Articles of Impeachment.
Ha ilarom han Konstitusyon, gin kikinahanglan an 1/3 nga botos o an kabug-osan nga 106 nga botos tikang ha 318 nga miyembro han Mababang Kapulungan han Kongreso agud maipasar an impeachment ug maipadara ini ha Senado nga magsisirbe kumo impeachment court.
Pagbubuhaton an botosay pinaagi han nominal voting, kundiin usa-usa nga tatawagon an kada kongresista agud bumotos hin “oo” o “diri.”
Paghihingadayan ha plenaryo an upat nga gin urusa nga Articles of Impeachment nga pinagdig-on han Justice panel.
Gin bubug-os an Articles of Impeachment han daw sayop nga paggamit han subra P600 million confidential funds, unexplained wealth han Bise, alegasyon han suhulan o bribery ha Department of Education, ngan an daw paghulga kan Pangulong Ferdinand Marcos Jr., Fisrt Lady Liza Araneta-Marcos, ngan anay House Speaker Martin Romualdez.
Ha kaluyo hini, nagpahimatngon naman an Partido Demokratiko Pilipino–Lakas ng Bayan (PDP Laban) nga diri kakarawton ha ira partido an mga mambaralaod nga ma botos hin pabor ha impeachment kontra han bise presidente sugad man, igba-blacklist an mga ini ngan diri na tutugutan dumalagan ha ilarom han PDP Laban ha mga masunod nga piniliay.
