Gin aghat ni Senator Sherwin Gatchalian an Social Security System (SSS) ngan an Government Service Insurance System (GSIS) nga pahilawigon pa an loan o pautang ha mga membro hini agud makapalit hin electric vehicles ha butnga han hitaas nga presyo han krudo.
Natuod hi Gatchalian nga an nasabi nga pitad in sigurado nga magpapalaksi ha transition o pagbalhin han nasud ha paggamit han mga EVs nga makakabulig agud maibanan an pagigin dependent han nasud ha paggmit hin imported fuel.
Puna han senador, damo unta an magkakaruyag nga makapalit hin EV pero nag-aalang an mga ini mahitungod ha hitaas nga presyo han mga electric vehicles.
Kun magkakamay-ada daw hin loan facility para ha pagpalit hin EV in mas mabubuligan hini an mga Pilipino nga yana in nakukurian ha paghitaas han presyo han gasolina ngan diesel.
An matitipid gihapon han mga kababayan ha gasolina ngan diesel in pwede igdugang ha pagbabayad han loan ha EV.
Dugang pa han magbabalaod, an mas haluag nga pagtukod han mga kinahanglan nga impratraktura sugad han mga charging station in nakaka-aghat ha mga organisasyon ngan mga kunsumidor nga bumalhin na ha paggamit hin EV.
