NATIONAL NEWS– Magpapasaka na hin kaso ha National Bureau of Investigation (NBI), hi Senadora Risa Hontiveros kontra kan Alyas ‘Rene’ an bumaliktad nga testigo ha hearing han nakalabay kasumpay ha daw pan-aabuso ni Pastor Apollo Quiboloy.
Ine iton magigin baton ni Hontiveros, mahuman nga magsarang an video ni Alyas ‘Rene’ kun diin gin-akusaran hine an senadora nga ginbabayaran hiya hin P1 million para tumestigo ha mga seryoso nga kaso kontra kan Quiboloy ngan igdabi hi anay Pangulong Rodrigo Duterte ngan Vice President Sara Duterte.
Labot kan Alyas ‘Rene’ papasakahan gihapon han senadora an mga nagpasarang hin video.
Sumala ha senadora, dire la fake news an video kundi usa nga witness tampering o panhahadlok ha testigo.
Paghulagway pa ni Hontiveros, hi Alyas ‘Rene’ an pautro-utro nga dumaop ha iya opisina, ngan waray ine ig black mail, ngan pinirit kundi boluntaryo ine nga nagpahayag han iya nahihibaruan.
Dugang pa han senadora, han nakalabay nga tuig, hi Alyas ‘Rene’ in nag-aro hin salapi agud nga igpalit hin laptop, kun diin klarado ha mga polisiya han iya opisina in dire hira naghahatag hin financial assistance ha potential witness.
Sanglit nga nagdig-on hin Hontiveros, nga dire niya papalahuson an mga testigo ngan tarhugon an Senado kumo institusyon.
