TACLOBAN CITY – Usa nga baraan nga misa nga mayda tema nga ‘Paghinumdom: A Tribute of Gratitude’ an gindumara ha New DZR Airport Tarmac Tacloban City para ha tumalikod na ha kadayunan nga Santo Papa nga hi Pope Francis.
Ha pangunguna ni Monsignor Ramon Agilos ngan han Vicariate of Tacloban, gindumara an misa kumo pakikiusa ngan pakikisubo ha pagkamatay han Santo Papa kun diin gin tambungan naman ine hin sobra 5,000 katawo tikang ha magkaduru-dilain nga parte han syudad, sugadman pira nga mga Mayors ha rehiyon.
Ha kaparehas gihapon nga lugar, napulo katuig na an nakalalabay han pagdumaraon ni Pope Francis an usa nga baraan nga misa agud makiusa ha pakikisubo han mga Yolanda survivors.
Sul-ot an mga dulaw nga disposable rain coats han mga tawo hadton 2015, an mahulos nga airport grounds, dara han madampog nga kalangitan in baga-baga hin nagin ‘sea of sunshine’ nga nagserbi naman nga lamrag ngan simbolo ha pagbabag-o han lugar kun diin ha pag-iha in ginkilala kumo City Hope dida han pag-abot han Santo Papa.
Ha nagin hulagway ni Department of Education Tacloban City Division Supervisor, Delilah Delos Santos, gin malatumat hine kun patiunan-o nakaghatag hin inspirasyon ngan paglaum ha iya an nagin pagbisita han Papa ha syudad kun diin nagin dalan daw ine agud mas magin ‘devoted’ hiya ha Ginoo.
Dugang pa hine, an pagigin mapainubsanon, pagigin maluloy-on, han Santo Papa an nagin dalan agud maibanan an kabug-at han gindadara hine ha iya kalugaringon kun diin natagan ine hin kamurayawan han makit-an hine hadto han Santo Papa.
