METRO MANILA – Waray aprubaran han Senado an hangyo ni Sen. Ronald “Bato” dela Rosa, nga magamit han iya pamilya an Senate Mansion ha Baguio City.
Madudumduman nga nagsurat hi Sen. Bato kan Senate Pres. Vicente ”Tito” Sotto III agud humangyo nga magpabilin an iya pamilya ha Senate Mansion para han pagbubuhaton nga CSAFP Cup shooting competition ha March 26-29, 2026.
Sumala han surat nga nakarawat han Office of the Senate Secretary, gagamiton la daw an mansion agud may-ada maukyan an pamilya ni dela Rosa. Waray naman nakabutang ha surat kun maupod gihapon an Senador ha nasabi nga aktibidad.
Sugadman, ginmalatumat ni Senate Secretary Mark Llandro Mendoza nga diri puydi mpagbigyan an hangyo han senador mahitungod nga ha pagkayana in gin-aayad an Senate Mansion.
Manunumduman nga waray na aatender ha Senado hi Dela Rosa para ha mga sesyon tikang pa han Nobyembre 2025, kasunod ini han mga notisya nga ginpagawas na an arrest order han International Criminal Court (ICC) may paghisumpay ha kaso nga crimes against humanity kontra kan anay Presidente Rodrigo Duterte.
