TACLOBAN CITY– Nagpagawas hin baton an mga otoridad kasumpay han natabo nga komosyon ka kulop nga adlaw ha butnga han mga riders ngan ira han-ay, ha kasagsagan han mga gios protesta ha syudad han Tacloban.
Sumala kan Abucay Police Station 2, Stattion Commander PMAJ. Shenna Layog, an nasabi nga panhitabo in ika-duha na nga pagprobar han mga ine nga sumulod ha usa nga grupo nga nagdudumara hin gios protesta, sanglit dayon nira ine nga ginpakianhan kun mayda ba hira permiso nga makagdumara hin motorcade o motor-rally kakulop nga adlaw.
Dugang pa ni Layog, nahibaruan nga an lider han nasabi nga motorista in dire taga Tacloban, ngan ine in residente hiton Cebu City, samtang an mga kaurusa naman hine in taga metro Tacloban.
Ginmalatumat pa hine, nga nagkikinahanglan hira hin permit ha mga sugad hine nga gios protesta, agud nga ma-asisteran hira, sugadman makag-hatag hin abiso para ha re-routing ha mga motorista, agud nga dire makagkawsa hin trapiko ngan makabalaong ha publiko.
Posible gihapon nga makagkawsa ine hiton kadelikaduhan ha seguridad han publiko, sanglit importante an permit nga ira gin-aaro ha kada grupo nga nagdudumara hiton gios protesta.
Usa gihapon nga gintagan duon ni Layog, nga importante an pagkakamayda hin permit to operate han gios protesta, in agud nga masigurado han ira han-ay an katalwasan ngan kahimyang kun diin pagdudumaraon an nasabi nga rally.
Waray naman may nasamaran ha han-ay hiton kapulisan nasabi nga komosyon, samtang abre naman an buhatan han Bombo Radyo Tacloban ha kampo han mga riders nga makaghatag han ira pahayag kasumpay ha nahitabo.
