TACLOBAN CITY – Nagpapadayon an mahugot nga imbestigasyon han mga kapulisan may kalabutan ha makarima-dima nga guinpanmatay nga magtiayon nga senior citizen ha Sitio Canmole, Brgy. Poblacion, Merida, Leyte.
Pinaagi ha guinbuhat nga pakipaghimangraw han Bombo Radyo Tacloban, guinmalatumat han hepe han Merida PNP nga hi PSI Joel Clitar nga guinkilala an mag-asawa nga senior citizen kan Florencio ngan Veranda Enclino nga nag-ukoy ha tay-aw nga area ha mao nga lugar.
Una hini, guintutuuhan ni PSI Clitar nga robbery an hinungdan han madugo nga panmatay mahitungod nga nawara an halin han guinbaligya nga karabaw han mga biktima.
Guinhulagway pa hini nga guinpukpok hin bato ha ulo an mister samtang nakaangkon naman hin damo nga tinadtaran ha lawas an misis hini nga nagresulta han dagmit nga kamatayon.
Samtang, una naman nga guinpahayag han mao nga opisyal nga may ada na nira nasisipatan nga responsable ha mao nga krimen.
